【Emily】《選擇》實體版 尾4期有復刻部分

【明報專訊】消委會旗下《選擇》月刊網上版明年開始免費開放畀公眾睇，實體刊物就會停售。喺噚日發布嘅新一期《選擇》，有4頁係「消委會50周年復刻號」，以雜誌過往嘅版面設計去回顧消委會歷史。總幹事黃鳳嫺話，最後4期《選擇》都會有消委會50年專輯部分嚟做倒數，今期復刻號就特登搵咗同事做model，還原番創刊號嘅封面，單調用色同粗微粒畫面效果學到足，非常有懷舊feel。

復刻號內容提到，《選擇》喺1976年11月創刊，當時日用品同糧油價格高企，消委會以純人手方式「格」盡全港70間超市，比較貨品每月價格走勢，分析「升價」同「降價」。時至今日，市民可以透過「網上價格一覽通」睇晒全港七大連鎖超市嘅貨品價格，消委會亦特別比較1976年同今年嘅物價，其中午餐肉同茄汁加得最多，喺接近半個世紀以嚟嘅升幅分別係712%同711%。