【Emily】人才辦開班教粵語 導師話「香」字較難發音

【明報專訊】今屆政府推出各項人才計劃，至今已有逾13萬人來港，不過當中唔少人不諳廣東話。有見及此，香港人才服務辦公室（人才辦）舉辦為期兩個多月嘅常規廣東話課程，透過教授日常生活廣東話用語同句式，例如搭車、購物、食飯等，協助佢哋盡快適應同融入本港生活。

課程由人才辦與大公文匯傳媒集團旗下嘅香港文匯管理學院合辦，共12節課堂，學員完成課程並通過考試後可獲發證書。人才辦總監劉鎮漢憶述，今年4月曾辦粵語體驗課堂，反應熱烈，於是推出長期課程，以小班方式及輕鬆手法教學。佢引述來港人才不論搵工、租屋等都認為需要學習廣東話，下一步會為佢哋嘅子女同非華語專才開班。

政府新聞網訪問課堂學員，來自上海嘅周錫晨話曾經嘗試以手機應用程式學廣東話，效果一般，口音好似機械人，認為實體課有助佢糾正發音問題。導師陳泳因表示，特意設計生活同工作場景，例如購物付款畀學員練習，又針對「香」、「商場」等較難發音嘅字詞訓練。