【Emily】同老友記整花燈 林定國話「會做多啲義工」

【明報專訊】律政司長林定國及審計署長林智遠上周六中秋節前夕分別率領義工隊探訪長者，送上溫暖與關心，其中林定國到元朗過渡房屋江夏圍村，同長者一齊製作花燈，佢話香港目前面對各種挑戰，首要凝聚人心，大家明白「同坐一條船」互相關心，仲話自己會以身作則做多啲義工。

林定國同律政司義工及博愛醫院義工隊上周六到博愛營運嘅江夏圍村探長者。林定國話雖然政府工作繁重，未必可以經常參與社會服務，但「勿以善小而不為」，佢認為香港面對不同挑戰，要增加信心、創造希望、傳播正能量，就應該先凝聚人心，佢亦會參與同籌辦更多義工活動。

至於林智遠就率領審計署義工隊到天水圍一間長者鄰舍中心，同長者玩遊戲，並送上月餅同小禮物，亦有小朋友為長者表演舞獅、筷子舞、唱歌跳舞等。林智遠話今年係國慶75周年，認為與中秋一樣，兩個節慶都係「圓」，代表「完整不缺，共融和諧」。