【Emily】長者咭9‧20起優惠周 逾300機構商戶推優惠

【明報專訊】長者咭計劃唔經唔覺推行咗30年，社署將喺下周五（20日）至26日舉辦「長者咭計劃三十周年優惠周」，到時全港18區超過300間機構同商戶，包括約1450間門巿，會向持長者咭嘅老友記提供飲食、零售等特別折扣同優惠。

參加嘅商戶包括譚仔雲南米線、大家樂、海皇粥店、安記海味、海天堂、余仁生、眼鏡88、佐丹奴等。參與機構同商戶會喺優惠周張貼宣傳海報，持卡長者用手機掃描海報上嘅二維碼，就可以瀏覽商戶嘅名單同優惠資料。

社署網頁（www.swd.gov.hk）同長者咭計劃手機App亦有相關資料。老友記如有查詢，亦可以喺辦公時間致電2152 2847聯絡長者咭辦事處。

長者咭計劃自1994年4月1日起推行，旨在推廣尊敬同關懷長者，透過印發長者咭畀年滿65歲嘅香港居民，方便佢哋享用政府部門、公共機構同商戶提供嘅折扣優惠。長者咭辦事處至今已發出超過250萬張長者咭。