【Emily】房協監事會換屆 凌嘉勤做主席 副主席梁國權抱恙 缺席大會

【明報專訊】香港房屋協會噚日舉行第72屆周年委員大會，選出新一屆監事會委員，隨即舉行今屆首次會議，由規劃署前署長凌嘉勤同港鐵前行政總裁梁國權分別獲選主席及副主席，任期3年。會後監事會大部分成員影大合照，但主角之一嘅梁國權因抱恙，噚日無去開會，稍後先可以接受其他委員當面祝賀。

梁父紹榮80年代做過房協主席

凌嘉勤當選後感謝房協委員支持同信任，佢話擔任房協主席係個人榮幸，同時亦感到任重道遠。佢又感謝前主席陳家樂任內帶領房協克服唔少挑戰，為房協長遠發展貢獻。

凌嘉勤又期望未來日子同房協監事會、執委會及管理層繼續秉承房協社會使命，以「創建宜居、永續共融」為目標，為香港市民提供多元房屋及建設共融社區，推動創新思維同可持續發展。

凌嘉勤2017年加入房協做委員，2018年1月起做執委會成員，同年9月獲選房協副主席，佢現時係理大暫任副校長（校園發展及設施管理）及賽馬會社會創新設計院總監。

梁國權1996年加入房協，多次獲委任監事會及執委會成員，並喺2012至2018年做房協副主席，而佢爸爸梁紹榮亦曾喺1983至1988年擔任房協主席。