【Emily】巨型國慶海報得一半 產業署：未來幾日完成

【明報專訊】75周年國慶臨近，全港多區都掛上唔少海報、國旗同區旗慶祝。Emily近日留意到，喺啟德嘅工業貿易大樓外牆掛咗一幅得大約一半嘅巨型國慶海報，旁邊又唔見做緊懸掛工程。政府產業署回覆時無話點解掛得一半，但就話其管轄嘅多幢政府聯用大樓外牆會張貼慶祝國慶嘅巨幅海報，包括工業貿易大樓，未來幾日會完成喺大樓外牆懸掛慶祝國慶巨幅海報嘅工作。

本報日前報道，喺新蒲崗行人天橋上嘅國旗同區旗有破損，原來啟德稅務中心都有。稅務局回覆話6月底委託承辦商喺稅務中心地下、二樓室內公眾大堂同室外有蓋行人通道懸掛以國旗同區旗組成嘅串旗，但喺「摩羯」吹襲後，稅務局派員巡查發現小部分串旗被強風吹至鬆脫同受損，已即時要求承辦商盡快跟進同更換，之後會繼續確保所有串旗狀况良好。