【Emily】維園綵燈城寨feel 有巨型發光叉燒飯

【明報專訊】康文署今年分別喺維園、香港文化中心露天廣場同青衣公園舉辦中秋綵燈會，食住早前大賣嘅電影《九龍城寨》熱潮，維園搭建咗本地大牌檔場景搭配經典地道菜式嘅「食」燈組，仲有劇中「標誌」之一嘅叉燒飯一大碗。

玩衣食住行元素

今次中秋綵燈會以國慶為主題，亦不乏生活元素，除咗「食」，仲有「住」、「衣」、「行」元素，維園展出古色古香嘅「四合院」燈組，亦有以唐裝及旗袍為造型、12米高嘅「衣」燈組，「行」燈組就以故宮太和殿同熊貓組成。

文化中心露天廣場早前已展出《月上龍宮》綵燈。噚日至「追月」（18日），維園同青衣公園就會展示唔同主題嘅綵燈，每晚6點半至11點亮燈，中秋夜（17日）延長至午夜。