【明報專訊】非中國籍香港永久居民今年7月起可以申請「回鄉證」（港澳居民通行證）往返內地，來自英國嘅如心酒店集團總裁曼寧（Simon Manning）噚日拎住回鄉證過關去深圳出差，佢接受傳媒訪問時大讚措施好好，畀外國人好輕易入到內地，以後可以最少每個月北上見客一次。
曼寧話，佢持有亞太經合組織商務旅遊證，唔使好似部分居港外國人咁每次返內地都要申請簽證，但過關時所需時間都唔少，所以以前出差過關時都要同行嘅同事等埋佢，𠵱家就唔使再阻同事時間，所以佢都好鼓勵在港外國人或無香港身分證嘅人申請。
佢話，有關措施喺歐洲、馬來西亞同新加坡嘅商會都受歡迎，希望通行證嘅期限可以由現時5年延長到10年。
