【Emily】中跑道試飛完成 三跑擬年底全運作

【明報專訊】機管局噚日宣布，重新配置嘅機場「中跑道」完成試飛，標誌住三跑道全面運作已準備就緒。機場早前擴建咗三跑，機管局話北跑道前年11月投入服務後，為配合三跑系統發展，中間嘅中跑道暫時關閉重新配置，包括重新平整，以配合連接滑行道、興建新跑道入口及出口滑行道、喺中跑道兩端興建新環端滑行道等。機管局話會繼續以年底前如期全面運作三條跑道為目標。

機管局喺上月聯同民航處、中國民用航空局飛行校驗中心合作喺中跑道試飛，以確保相關空中航行服務設備、飛行程序及飛行區地面燈號系統符合國際民航組織嘅標準。三跑系統將會提升機場運力，以滿足預計2035年有1.2億人次旅客處理量及1000萬公噸貨運量嘅長遠需求。

新冠疫情後機場客貨量齊升，但仍未回復至疫情前水平，以今年7月計，在過去12個月客運量4920萬人次，而貨運量有470萬公噸。另外，香港國際機場亦喺今年度「世界旅遊獎」再獲肯定，自2020年以來第四次獲選「亞洲最佳機場」，仲連續3年獲選「中國最佳機場」。