【明報專訊】天文台前台長岑智明噚日喺社交媒體分享咗一段約1分鐘嘅短片，片中嘅佢戴住「四方帽」，接受中大歷史系訪問，分享自己點解退休後修讀中大比較及公眾史學文學碩士課程（圖）。
岑智明話當年上任台長不久，天文台要慶祝成立130周年，需要籌備一個展覽，其間搵到好多天文台嘅資料，包括香港風災史，大大開闊咗佢嘅眼界。佢話真係可以以史為鑑，所以退休之後希望做一啲歷史研究。佢同Emily講，中大訪問佢嘅片段係舊年11月畢業禮之後拍攝，中大噚日先至出post，話2025/26學年現正招生，所以佢就分享咗呢段訪問，幫手宣傳下咁話。
