【Emily】同死黨遊疆 林健鋒抱佛腳求好運

【明報專訊】暑假結束，行政會議及立法會仍然休會，唔少議員趁機外遊或外訪。早排因為反映企業融資困難而淚眼汪汪嘅行會成員林健鋒，就同一班相識幾十年嘅好友去咗近期旅遊熱點新疆，林健鋒暫且拋低煩惱，影相時笑盈盈，成個大細路咁，去到見到佛像就「抱佛腳」，祈求好運。

林健鋒話，今次新疆之行最難忘嘅景點必定係位於吐魯番嘅世界文化遺產「交河故城」，話嗰度係古絲綢之路嘅交通要道，形容係中華五千多年文明史上重要見證，係小說《西遊記》中「車遲國」嘅原型，佢話同朋友置身現場對宏大嘅古建築感到震撼。佢亦有去火焰山，話當時溫度計顯示地面氣溫達到46℃。

梁美芬逛洛陽泰式廟宇

另一邊廂，多名港區人大代表去咗河南考察，其中身兼立法會議員嘅梁美芬去參觀洛陽白馬寺附近嘅泰式廟宇，話影相出嚟嘅效果以為去咗泰國，又話白馬寺附近仲有印度寺廟建築群，體現中國對唔同宗教嘅包容。人大常委李慧琼就話洛陽係歷史古都，擁有眾多文物遺蹟，市內有102家博物館，全部免費對外開放。