【Emily】打風三無廈停電 區議員DO搵埋工會搶修

【明報專訊】超強颱風「摩羯」襲港期間，勞聯主席林振昇喺facebook話黨友深水埗區議員李詠民收到有「三無大廈」居民求助話突然停電，李即刻拉埋深水埗民政專員（DO）黃昕然去睇睇，仲搵咗機電業工會聯合會主席張永豪由港島趕去義務搶修，盡快令大廈恢復電力，居民就唔使夤夜搬去臨時庇護中心。

李詠民同黃昕然去到現場時，先確認停電係電力裝置零件問題，同供電無關，再叫張永豪去緊急維修。九龍西立法會議員梁文廣及另一深水埗區議員陳偉明都有帶埋外置電池趕去，以備不時之需。

關愛隊清斷枝 六旬梁福元出動

風雨期間，元朗區十八鄉東、西關愛隊都出動移走大樹斷枝。睇相見到，年屆六旬嘅十八鄉東關愛隊長梁福元都戴住頭盔、著住水鞋一齊執樹枝，佢個仔、元朗區議員梁明堅都有轉載。而8號風球噚日中午除下，但各區仍有大雨，多區區議員同關愛隊都有落區，睇下有無水浸、執走地上樹枝等，亦有協助清理坑渠附近嘅落葉，避免水浸。