【Emily】倡邀Oasis啟德開騷 田北辰叫局長搵定聯絡冧把

【明報專訊】啟德體育園明年首季開幕，政界紛紛獻計，希望政府邀請巨星來港打響頭炮。實政圓桌立法會議員田北辰就建議，邀請最近因Gallagher兄弟（圖）和好而宣布重組嘅英國搖滾樂隊Oasis來港開騷。Oasis正喺英國巡迴演出，田北辰叫政府盡快接洽對方，「希望局長快啲起而行之搵咗人哋電話先啦」。

料吸中日韓歌迷 賣飛無問題

體育園開幕在即，預計英國搖滾樂隊Coldplay會係首隊開騷嘅外國明星。田北辰噚日就建議政府接觸Oasis，話對方重組係近期樂壇最重磅消息，現時Oasis喺英國嘅巡演售出過百萬張門票，認為如果對方喺啟德搞10場演唱會，可以吸引到中、日、韓同東南亞嘅歌迷，要賣晒啲飛唔成問題。

田北辰重提政府今年初未能爭取美國歌星Taylor Swift來港演出，叫當局把握時間及早接觸Oasis，先傾吓意向同條件，仲點名文體旅局長楊潤雄「快啲搵咗人哋電話先」。