【Emily】過渡房賢庭居住戶：有大家庭感覺

【明報專訊】政府興建多個過渡房屋項目，畀住喺劏房等不適切居所嘅市民申請入住以改善居住環境。房屋局長何永賢噚日喺facebook上載短片，片中訪問已搬入將軍澳過渡房屋「賢庭居」、需以輪椅出入嘅住戶黃先生，話新環境好咗，意外收穫係鄰里間仲有「大家庭」感覺。

房屋局：入住率已逾80%

睇番立法會6月資料，賢庭居截至4月嘅入住率約74%，當時被指入住率偏低，同市區九成多嘅入住率有距離，不過房屋局同Emily講，賢庭居截至8月底嘅入住率已超過八成，歡迎有需要市民申請。

入住咗賢庭居嘅黃先生話，搬入過渡房屋後環境大大改善，而有不少家居維修經驗又習慣一個人住嘅佢，不時喺居民群組教路。佢話𠵱家街坊之間好似一個大家庭，出出入入會點頭問好，「以前住嗰度（啲人）睬你都傻」。局方就希望有更多居住環境惡劣嘅市民願意踏出改變嘅一步。