【Emily】若好天 中秋可見超級月亮土星合月

【明報專訊】9月17日（周二）係中秋節，天文台噚日分享一個「中秋節賞月錦囊」，話如果天氣許可，市民可以喺中秋節前後嘅晚上睇到又大又圓嘅「超級月亮」，仲可以肉眼睇到土星，即係「土星合月」嘅天文現象。

全球將現月偏食 香港睇唔到

天文台話，中秋嗰晚月出時間係下午5點58分，而「上中天」就喺夜晚11點57時，其時月球橫越本地子午線，月球位於正南方，仰角係全晚最高。不過，喺地球望上天，要睇到完全被照亮嘅滿月，就會於中秋翌日上晝10點34分出現。滿月時，南美洲、北美洲大部分地區、歐洲、非洲、亞洲西部等地都會出現月偏食，但香港就睇唔到。

天文台仲話，月球喺中秋節同翌日都會運行至「近地點」，即最接近地球位置附近，過程中兩者距離只有約35.074萬公里，到時肉眼所見嘅月亮，視覺上會增大約7%。