【Emily】探天星工會元老 黃國：係學習榜樣

【明報專訊】工聯會理事長黃國噚日聯同小輪業職工會理事長范強一齊去元朗一間安老院，探訪當年有份創辦工會嘅老前輩布林添。小輪業職工會前身係天星小輪有限公司職工會，50多年前到天星小輪任船長嘅布林添係工會創辦人之一，黃國話佢當年一直喺天星做到退休，係擔心無人為工友出聲、爭取權益。

布林添今年77歲，𠵱家住喺一間政府支持嘅慈善機構營辦嘅老人院，黃國話，同房仲有另一位97歲海員工會嘅老會員。黃國提到，布林添當年話過，因為自己有份創立天星工會，對工友有責任、有感情，就算其他公司高薪利誘佢，佢都一直喺同一公司做到退休。

黃國話，布林添在職時每日放工都會去工會做義工，協助處理會務，退休後都積極參與工會工作，黃國話工會發展得以壯大，正正因為有無數好似布林添咁無私奉獻嘅前輩默默耕耘，係佢哋嘅學習榜樣。