【Emily】檔案館新展「囍存檔案」 回溯婚禮舊俗

【明報專訊】政府檔案處歷史檔案館噚日推出新展覽「囍存檔案」，展出超過70件同婚禮相關嘅展品，包括舊式結婚證書同婚姻條例，涉及法案、婚禮程序及婚慶習俗，見證香港婚姻制度發展嘅歷史時刻。

展覽說明，香港嘅民事婚姻法例最早可追溯至1852年，到咗1875年香港已開始使用登記冊紀錄，日佔時期政府都冇斷過婚姻登記，其間舉行婚禮嘅所有婚姻均屬有效，甚至赤柱拘留營嘅婚禮都有登記。香港早已確立婚姻法例，但直到1971年、即53年前，先至正式以法律形式確立一夫一妻制。

由有婚姻法例至今，都有要求結婚嘅人要向婚姻登記官提交結婚通知書，惟婚姻登記官一直由唔同官員兼任，土地登記官、入境處長都做過婚姻登記官。

展覽並展出結婚請柬、宴會菜單、喜餅盒、禮券等禮品圖片，並播放兩段舊影片，分別記錄水上人家喺午夜接新娘、新人喺船上向長輩敬茶等場面，及以前嘅婚宴。展覽逢周一至周五，上晝9點至下晝5點時45分喺觀塘翠屏道13號香港歷史檔案大樓2樓展覽廳展出（公眾假期除外）。