【Emily】校史館揭戰前創意追女法 皇仁仔情信摺飛機擲鄰校庇理羅士

【明報專訊】教育局近日公布性教育教材引起爭議，社會關注點樣教育愛情觀，不過原來戰前嘅香港中學生追女仔方式已相當前衛。皇仁書院（QC）校史館噚日喺facebook分享一個1930年代學生嘅自傳，提到當時QC同庇理羅士女子中學（BPS）僅一街之隔，唔少QC男生將情信摺成紙飛機飛向鄰校追女仔。

惹對方校長登門投訴

書中提到，當時位於中環嘅QC同BPS只係相隔一條街，而QC地勢較高，一眾男生用頗有創意嘅方法追女仔，就係將情信摺成紙飛機飛向鄰校，部分甚至直接飛入課室。本書話此舉更引嚟BPS校長親自登門向QC校長投訴。

本身係QC舊生嘅立法會前議員梁繼昌亦有分享帖文，並暗諷教育局，話80幾年前嘅學生有心儀女生亦毋須相約打羽毛球，用紙飛機寫情書相當浪漫，仲讚賞係「發乎情，止乎禮」。