【Emily】網傳「高才創業領百萬公帑」 孫玉菡話誤導

【明報專訊】勞福局長孫玉菡噚日結束一連四日訪問北京行程，今次佢坐動臥列車上京，大讚房間牀鋪遠比學生時代坐過嘅三層硬臥舒適。過去兩日佢到訪清華大學同北京大學，同清華大學黨委副書記過勇教授同北大黨委副書記、副校長甯琦會面，介紹特區政府招攬人才措施。佢話行程有特別任務，事緣政助傅曉琳係清華畢業生，6月完成高級公共管理碩士香港政務人才項目，故趁機喺清華大學同佢影畢業相。

孫玉菡又喺facebook提到近日留意到網上流傳「高才通創業攻略」聲稱一年就可領取政府百幾萬補貼，佢批評帖文作者對香港情况一知半解，內容有誤導之嫌。

佢話政府推出各企業資助計劃，為確保公帑用得其所，相關政策局同部門有嚴格審批程序同監察機制，確保只有符合資格嘅申請先會獲通過，如果有人為獲得資助而向政府提交失實資料同文件，須負刑責。佢話政府對合資格申請者包括經高才通來港人才及業務都一視同仁，能通過審批獲資助嘅企業，必能為香港發展帶來貢獻。