【Emily】三代坐動臥快閃遊滬 田二少爬唔到上格牀

【明報專訊】香港往北京及上海嘅高鐵動臥列車6月開通，實政圓桌立法會議員田北辰終於有機會試「瞓」，話因為夾孫仔孫女及仔女假期唔易，至上周安排到嚟一趟快閃出行，一家三代共12人上周五晚搭通宵火車去上海，周一朝早就回程返到香港，仲話玩足兩個全日，只需租一晚酒店。不過，田二少話，今次本來安排自己瞓上格牀，因為太太怕啲孫喺上格跌落牀，但佢自嘲「歲月不饒人」，爬極都爬唔到上去，結果由最大嘅孫女瞓上格牀。

外灘熱鬧 嘆港今非昔比

倡增宣傳「反吸」內地客

田二少話佢一向有留港消費，早排先搞完本地遊活動，但成日想一家去旅行玩吓，而老幼夾期唔易，咁啱有通宵火車選項，可以安排到周末短trip，佢又想體驗吓瞓火車，所以成家人起行。佢話列車離開西九龍站時，車上都唔係太多乘客，一到咗深圳北站就好多人上車。佢同人傾偈，發現內地人都好鍾意一家大細周末搭火車去周圍嘅城市玩，話坐火車由市區到市區好方便，有啲一家大細去上海，有啲去杭州。

田二少話，周末嘅上海外灘好熱鬧，嘆香港今非昔比。佢認為香港可以多啲宣傳通宵火車，甚至加班次，向內地客宣傳，反吸佢哋來港周末快閃玩兩日，相信對遠程客都有吸引力。