【Emily】否認性教育追唔上社會發展 教局：堅拒婚前性行為 增自我保護意識

【明報專訊】教育局早前推出中三級公經社科教材，其中關於性教育嘅部分引起熱議，有評論更批評教材傳遞不合時宜嘅價值觀。教育局噚日發文回應，話堅決拒絕婚前性行為可以提高學生嘅自我保護意識，起預防作用，以免犯下不可逆轉嘅過失。局方亦強調要充分保護未成年學生，同時要提醒佢哋香港法例嚴厲懲處同性相關嘅違法行為。

對於有人認為香港性教育未能追上現代社會發展，教育局認為呢個睇法唔正確，話香港學校課程嘅性教育，係要培養學生成為有整全價值觀嘅人，等佢哋將來喺思想及條件成熟嘅時候，對性作知情及負責任嘅決定，又話如果鼓吹未有能力承擔後果嘅學生作出所謂嘅知情決定，係唔專業同唔負責任。

教育局又話，局方有專業責任確保課程配合學生嘅心智發展同成熟程度，同時要顧及社會期望、家長意見、道德倫理同法律等相關因素，而學校教授與性相關議題嘅時候，亦須配合學生成長需要，培育佢哋持守正確嘅價值觀同態度，作出合理嘅判斷，同負責任、合法及合乎道德嘅抉擇。