【Emily】孫玉菡引MIRROR歌詞勉明Teen團

【明報專訊】由賽馬會支持、為期5日嘅「共創明Teen計劃」杭州學習團噚日結束行程返港。曾經隨團嘅勞福局長孫玉菡喺facebook撰文話，相信活動令同學仔眼界大開，自己亦好感動見證佢哋嘅成長同笑容，希望佢哋努力開創未來，建設更美好香港、為國家出一分力，佢並以男團MIRROR嘅《We All Are》歌詞「時光匆匆 我即使挫敗過 請信任我 真心的栽種最後會結果」寄語同學仔。

孫玉菡話，好高興喺過去兩日同80名「共創明Teen」隊友訪問杭州，參觀咗浙江大學、欣賞咗《印象西湖》，再到總結晚宴上睇到同學嘅表演同分享，畀佢哋嘅成長同笑容感動，期望喺政商民三方嘅合作，為佢哋嘅未來增添無限可能。

孫話，今次係佢出任局長後第一次到訪杭州，參觀咗海外高層次人才創新創業基地同拜訪當地企業，了解到國家點培育創科人才同資訊科技嘅發展，亦趁呢個機會探討點應用資訊科技提升本港服務水平。

孫玉菡並同杭州市人才辦同浙江省人社廳嘅領導會面，交流兩地人才政策。