【明報專訊】巴黎奧運已經閉幕，唔少市民都有收睇港隊出戰嘅賽事，今屆政府同上次東京奧運一樣，買入巴黎奧運轉播權，康文署亦喺全港18區指定嘅體育館設「活力奧運觀賞站」播放賽事，上月27號開放到前日，每日朝8晚11。署方噚日公布觀賞站開放期間約有7萬人次入場觀賽。署方嘅觀賞站有18個，奧運為期16日，按此推算，平均每個站每日有243人次去過。
巴黎奧運結束後，緊接嘅殘奧賽事會喺當地時間本月28號至9月8號舉辦，政府亦有購入殘奧賽事嘅轉播權，康文署話亦會喺各區開放觀賞站畀市民觀賽，直至殘奧閉幕，不過具體開放時間同其他詳情就要稍後先公布。
