【Emily】蔡若蓮同議員訪滬 探討愛國主義教育

【明報專訊】教育局長蔡若蓮聯同立法會教育事務委員會考察團14個議員正喺上海考察，佢哋噚日參觀中共一大紀念館、四行倉庫抗戰紀念館，了解中共誕生歷史同抗日事蹟；同日又同上海市教育委員會喺座談會探討愛國主義教育、人工智能等議題。隨行嘅教育委會主席梁美芬話，兩地喺「產學研」等領域可互相借鑑，又認為要善用科技推進愛國主義教育。

梁美芬倡用科技教愛國

考察團噚日仲去咗同濟大學附屬新江灣城實驗學校、中國福利會幼兒園，今日上晝就去張江機器人谷、復旦大學類腦智能科學與技術研究院，同在滬港人、學生交流後，再去蘇州考察。

隨隊嘅政府「愛國主義教育工作小組」組長李慧琼噚日喺facebook大讚參觀紀念館嘅行程「極具啟發性」，認識到愛國主義精神嘅歷史根源，同體會到國家發展歷程同人民奮鬥嘅艱辛。佢仲話會借鑑今次經驗，以多元、全方位開展愛國主義教育，令工作更入屋、貼地。民建聯議員顏汶羽就話，沙頭角都有間民間抗戰紀念館「羅家大屋」，呼籲本港要保育抗戰遺蹟，畀市民同青年參觀。