【Emily】伙地產界晤金管局 反映借貸難 嘆工商界捱多年 林健鋒眼濕濕

【明報專訊】經民聯噚日聯同地產代理界代表見金管局副總裁阮國恒，反映業界苦况。經民聯副主席林健鋒會後見記者，提到工商界由2019年捱到𠵱家，就係希望等到經濟復蘇，為香港經濟貢獻，形容捱咗咁多年，最後唔可以為香港貢獻係好可惜，希望金管局、銀行業等聯同業主、工商勞工界一齊推動經濟。佢仲一時感觸哽咽，眼眶泛淚，「即係大家可以……同舟共濟，共渡時艱，所以希望大家可以……平平安安」。

林健鋒提到，撤辣後樓宇成交宗數增加，但銀行業收緊或拖慢按揭貸款，有啲交易因為按揭審批時間過長而撻訂，部分銀行又拒絕為高樓齡樓宇承造按揭，亦有銀行收緊細單位按揭條件、降低按揭年齡上限等，令樓市一潭死水，工商借貸「活不起來」，影響置業融資。佢話業界喺會上提出唔同個案，而金管局話明唔會聽完算數，會積極處理。

美聯集團董事總經理黃子華話，近日無論住宅或非住宅嘅新造按揭大多唔獲批，令樓市流轉唔到，搞到有資金嘅市民買唔到樓，想按揭套現嘅亦唔得，導致近日出現結業潮。