【Emily】港鐵擬電子化 卡片式單程票或絕迹

【明報專訊】港鐵單程票設計喺過去45年隨時代不斷演變，由紙車票、磁帶票、再到現時「嘟」入閘嘅智能車票，Emily聽聞今個月中起港鐵再有新嘗試，有可能推出電子二維碼（QR Code）單程票。市民用手機喺港鐵MTR Mobile App買飛後會收到二維碼，喺閘機前掃碼就可以入閘搭車，意味實體單程票或成為歷史，唔知一眾「鐵膠」會唔會趁呢幾日買多幾張收藏留念？

港鐵回覆時無直接話係咪有相關計劃，只係話數年前已制定自動收費系統嘅長遠資產更新計劃，𠵱家全部港鐵站客務中心已有電子支付，重鐵網絡每個站亦有可掃描二維碼嘅閘機。港鐵話整項計劃涉超過13億元，預計2028年完成提升全部閘機。

立法會議員張欣宇向Emily透露，將來單程票全面改為電子二維碼後，乘客喺站內售票機買飛後，仍會得到「實體飛」，不過可能只係一張印有二維碼嘅車票，唔會再係舊款嘅卡片式車票。佢又話，𠵱家港鐵重鐵網絡每個車站至少有一部閘機可以嘟二維碼，相信未來所有閘機都有相關功能。