【Emily】城巴加薪3.6% 推子女結婚假

【明報專訊】城巴宣布全體員工整體加薪3.6%，並維持舊年嘅加薪最低保障安排，即係最低加薪金額唔少於810元。雖然加幅同最低金額都略為少過舊年，但城巴今年會新設「子女結婚假」，畀同事與子女一齊慶祝人生大事喎！

睇番舊年，城巴整體加薪4.3%，月薪加幅不少於910元。城巴話過去一年持續面對通脹壓力，包括工資、燃油、供應鏈等成本上升，但票價維持於同一水平超過一年，儘管經營面臨困難，仍然決定提出具競爭力嘅加薪方案，以答謝員工嘅付出、維持良好嘅勞資關係。

前線員工最少加810元

城巴又話，今年公司主動邀請勞資協商會、工會及員工代表參與多場會議，聽取各方意見，同時探討改善待遇及工作環境嘅可行方案，經充分考慮員工意見後，決定全體員工整體加薪3.6%；至於前線員工，包括全職車長和維修員工等，將獲最低加薪保障810元。在計及最低加薪保障後，城巴員工平均加薪幅度為3.86%。

各前線員工今年9月1日起加薪，非前線員工將如期做年度工作表現評核，按表現喺明年1月調整薪酬。