【Emily】楊永杰赴西安考察 倡港推廣內地氫企

【明報專訊】立法會正值暑假休會，有議員外出旅行，亦有議員到內地考察，九龍中議員楊永杰就聯同4名九龍城區議員，一連5日北上西安考察，噚日結束。考察團去咗了解當地基層治理服務同開展中國歷史文化研習，行程包括到訪「秦創原綜合服務中心」，了解當地如氫能等嘅創科發展。

楊永杰話考察活動豐富，仲話想向政府提議將本港打造成內地氫能企業嘅推廣站，加強同西安等內地城市發展氫能嘅企業合作。

楊永杰等人又去咗以盛唐為背景嘅「西安大唐不夜城」步行街，提到當地將綵燈、唐朝帝王等歷史人物雕像融入街道，沿路唔少旅客著漢服，覺得呢種以文化融合旅遊嘅做法值得香港借鏡。今次西安行團員另有馮務君 、劉婉燕、何華漢、梁婉婷4個九龍城區議員。

至於民建聯就有議員留港參觀，主席陳克勤聯同議員周浩鼎、顏汶羽，以及一眾區議員前日參觀天文台，了解天氣及環境監測方面嘅工作，佢哋話期望天文台加強應對極端天氣嘅工作，將其破壞同影響減至最低。