【Emily】盛傳江旻憓加入 馬會：唔評論 消息：奧運國家隊代表月底訪港

【明報專訊】巴黎奧運女子重劍個人賽金牌得主江旻憓前日宣布「告別全職劍擊運動員生涯」，期待有新職業發展「回饋香港」，各方都好想知道「劍后」去向。Emily收到風，話熱心公益嘅江旻憓盛傳會加入馬會，負責與對外事務有關崗位，參與社區及公益有關事務。Emily就此向馬會求證，馬會噚日回覆就話唔會評論傳聞喇。

江旻憓前日喺Instagram宣布，完成佢第三次奧運之旅後，決定休息一下，告別全職劍擊運動員生涯，期待有新職業發展，等佢可以學習及成長，裝備自己，回饋香港，同時累積經驗，為設立佢嘅慈善基金做好準備，讓小朋友重拾運動樂趣。

江周六任青年論壇嘉賓

江旻憓呢兩日無現身，根據民青局facebook嘅活動資料，政府喺周六（10日）舉辦「青年發展高峰論壇」，屆時江旻憓會任演講嘉賓，唔知到時佢哋會唔會回應吓呢？峰會有馬會支持，馬會公司事務執行總監譚志源亦會同場出現。

另外，按照以往做法，奧運之後中國國家隊獎牌運動員都會應邀訪港，Emily收到風，國家隊代表將於本月底訪港，據悉屆時佢哋除咗會出席招待宴會及參觀活動，當然唔少得有獎牌運動員獻技，以及同港人交流嘅環節。