【Emily】法律博士JD唔係PhD 葉劉：唔少傳媒搞亂

【明報專訊】巴黎奧運女子重劍金牌得主江旻憓（Vivian）「文武雙全」，佢嘅學歷連日掀起討論。行政會議召集人葉劉淑儀噚日話，留意到唔少媒體將Vivian喺中大修讀嘅法律博士課程（Juris Doctor，JD）誤當成博士學位（PhD），解釋其實JD係授課式研究生課程（taught post-graduate programme），為本科唔係讀法律（法學士LLB）嘅人而設；又話如果想做執業律師，要讀埋法學專業證書（PCLL）。葉太又話，如果Vivian讀埋PCLL，好適合加入法律行業，成為行業瑰寶。

JD係授課式研究生課程

睇番中大JD課程網頁，兼讀生修課期兩年，全職則1年，以每單元6680元計，讀晒全個課程72個單元，學費總共480,960元。除咗中大、港大及城大都有開JD課程。

另外，Vivian本科畢業於美國史丹福大學，主修國際關係，亦持有中國人民大學法律碩士學位，近日網上流傳佢篇碩士論文，主題係〈透過『佔中事件』反思香港特區選舉制度完善路徑〉引起熱議。不過，江旻憓喺人民大學修讀嘅課程，都同律師執業資格無關。