【Emily】「發哥名健鋒樣」fb周圍add人 當事人提醒：假帳戶

【明報專訊】影星周潤發與經民聯立法會議員林健鋒（Jeffrey）驟眼看來似乎無關係，不過Emily近日收到一個以「ChowYunFatt」為名嘅facebook帳戶傳來交友邀請，頭像竟然係林健鋒嘅相片。Jeffrey就向Emily澄清呢個係假帳戶，呼籲大家小心，仲趁機大曬早排與「真．發哥」嘅合照。

呢個facebook帳戶名稱與發哥英文名「Chow Yun Fat」好相似，不過無用到發哥做頭像，而係上載多張林健鋒嘅相，包括佢出席立法會活動。Jeffrey澄清帳戶並非由佢管有，話過去不時有人盜用佢嘅相片開假帳戶，呼籲大家提高警覺。

提起發哥，Jeffrey趁機分享早排食飯時見到對方並自拍嘅合照，相中見到發哥留長頭髮同留鬚，Jeffrey仲笑住問相中邊個靚仔啲。