【Emily】盧煜明勉超級狀元 科學家需先培養興趣

【明報專訊】有「無創產前檢測之父」之稱嘅香港科學院院長盧煜明前日出席科學活動，同聖若瑟書院師弟兼今年DSE超級狀元廖俊翔傾談科學家嘅人生規劃。廖問成為科學家需要咩「核心要素」，盧煜明就話科研需要多個領域嘅合作，勉勵同學趁後生打好知識根基，但唔使急住揀定專研領域，反而要多培養興趣，多閱讀科學雜誌同參與科普活動，擴闊視野。

由香港未來科學大獎基金會喺2016年設立嘅「未來科學大獎」設生命科學、物質科學、數學與計算機相關三大獎，單項獎金為100萬美元。大會前日喺香港展開大獎周活動，首場講座邀請盧煜明分享科學家嘅人生規劃，佢與廖俊翔交流，吸引近200個學生同家長參與。

盧煜明話科學探索係要融入日常生活，洞悉一啲睇落無關嘅現象嘅關聯性，佢舉例話自己其實係煮即食麵同睇電影時得到靈感，啟發其諗到孕婦血漿內有高濃度胎兒DNA，及後幫佢開創咗「無創產前診斷技術」。