【Emily】未聞UNIQLO有運動出品 何俊賢被指無知

【明報專訊】全城聚焦奧運，民建聯立法會漁農界議員何俊賢都有睇港隊同其他隊伍嘅賽事，佢一度喺facebook話，瑞典乒乓球隊球衣由日本知名服裝品牌UNIQLO提供，然後話「無乜聽聞佢有乜運動出品」，仲反問塊乒乓波板會唔會係瑞典某連鎖家俬店提供呢？

何議員言論一出就引起唔少網民質疑，話呢個日本品牌雖然主要賣休閒服裝，但都有運動員代言，例如已經退役嘅瑞士網球天王費達拿。何俊賢就留言回覆話，「我無乜留意咁細……但佢（品牌）本身形象唔似運動品牌」。有網民留言話佢「無知」，何議員話自己「不可能全知全能」，又反問網民「而家是要發表論文嗎？以為別人一定要全知才是有病」。筆戰一輪，何俊賢最後都刪帖了事。有網民再留言提醒佢，涉事日本品牌「都有贊助香港傷殘運動員，你可以多多關注」。