【Emily】形容「有志做律師」 律師會賀江旻憓奪金

【明報專訊】「微笑劍后」江旻憓（Vivian）喺巴黎奧運女子個人重劍攞金牌後，各方祝賀信息繼續湧至。律師會噚日向仲讀緊法律博士（JD）嘅Vivian祝賀，並特別形容佢「有志成為律師的江旻憓」（would-be lawyer）。

律師會讚揚Vivian喺訓練同讀書之間取得平衡，實在好唔容易，又話好高興由傳媒報道得知Vivian「計劃在畢業後成為一名律師」。睇番Vivian 2021年同律師會理事會改選部分候選人活動嘅對話時，佢提到去史丹福大學讀國際關係係想去聯合國工作，又謙稱「唔知有無能力成為律師」。佢前年12月喺芝加哥大學香港校園對談又話，未好肯定讀法律理由，不過好鍾意律師思考過程，又形容自己作為運動員有時思考比較直線同天真，「希望可以知性同聰明啲」。

除咗奧運，香港出年11月承辦全運會部分賽事，律師會話已經籌備緊義工團隊，話有興趣會員可以報名。