【Emily】深水埗舊𨋢門搵到好人家 免變廢鐵 業主：皆大歡喜

【明報專訊】本報喺5月份報道，深水埗南昌街60年樓齡嘅廣豐樓，因為要更換舊款升降機，而業主眼見古董升降機部件當廢鐵棄掉好可惜，於社交平台呼籲有心人接收。大廈業主同Emily講番事件進展，話唔少人對舊物有興趣，13隻升降機門日前已獲6組收藏者運走，當中有非牟利機構嘅古蹟資源中心，亦有幾間舊物店取用做裝飾，更有藝術愛好者收藏。

大廈業主同Emily講，原先都驚會剩番一兩道電梯門，要業主自己清理，𠵱家全部有人取走，皆大歡喜。業主話，為咗保留呢啲組件，一直同電梯公司周旋，要求配合，因為業主眼中好有歷史價值嘅嘢，對電梯公司嚟講只係廢鐵，怕佢哋掉咗啲配件；而今次成功搵到收留者，業主們都感到好滿足。被拆走嘅迅達牌升降機機門髹上深綠色，喺大廈入伙時已使用，大廈一直有為舊𨋢定期保養，但因為升降機實在太舊款，已好難搵到配件，且維修費好貴，業主縱有不捨，最後都決定換上新款升降機。