【Emily】肝炎檢測快車巡迴各區 免費測乙肝 重遇活肝移植康復者 盧寵茂：莫大欣慰

【明報專訊】7月28日係世界衛生組織訂立嘅「世界肝炎日」，醫衛局長盧寵茂噚日就去咗香港肝壽基金會「肝炎檢測快車」啟動禮，其間有緣重遇昔日嘅病人。原來啟動禮嘅年輕男司儀係活肝移植康復者，當年係由本身為肝臟移植權威嘅盧醫生幫佢做移植手術。

料41萬人乙肝 四成人未知

醫衛局喺facebook話，盧寵茂見到佢重拾健康人生，作為醫者感到莫大欣慰，又話預防勝於治療，肝臟移植係治療末期肝臟疾患嘅最有效方法，愈多人支持器官捐贈，就能令更多患者重獲新生。

醫衛局提到曾有調查推算香港約有41萬人患乙型肝炎，當中四成人未知自己受感染；七成未有跟進肝病情况，而呢部「肝炎檢測快車」將巡迴各區向市民提供免費乙肝檢測服務 ，同埋透過公眾健康教育推廣乙肝預防同治療，提高市民對乙肝嘅認識，朝住世衛倡議嘅「早檢測、早跟進」方向邁進，形容係「意義非凡」。

為咗響應「世界肝炎日2024」，衛生署以「治理乙肝 保障健康」為主題加強宣傳，希望提高市民對病毒性肝炎嘅關注，及提醒慢性乙肝患者要定期接受檢查、治療同醫療跟進，以控制病情。