【Emily】邱達根憶39年前睇兵馬俑要揸電筒

【明報專訊】暑假期間部分議員會到外地考察，其中「G19」有8個議員去完西安4日3夜，當然有去睇兵馬俑，其中科技創新界議員邱達根（Duncan）話，第一次去西安係39年前，當年跟父親邱德根及亞洲電視攝製隊，參加第一套內地取景大型電視劇《秦始皇》嘅合作儀式，其間去咗睇兵馬俑「探險」。

亞視拍《秦始皇》 睇合作儀式

Duncan話當年獲西安政府安排參觀兵馬俑，由於部分地方未對外開放，亦未有充足照明裝備，每個人都係攞住電筒，好似探險咁，令年紀小小嘅佢印象深刻。至近日再去，Duncan話感覺好唔同，因為估唔到閒日都有6萬幾人參觀，皇陵入面又無冷氣，奉勸想去嘅人，唔想迫可以等到2029年後先去，因為到時應該有多幾個有冷氣嘅新館落成。

考察團仲參觀當地嘅航空、航天等其他產業，包括閻良航空基地、中歐班列（西安）集結中心、糧油進口及加工企業西安愛菊集團、專責為西安市引進及培育人才嘅西安人才集團等。身兼西安市政協委員嘅考察團副團長陳沛良認為，西安有好多發展優勢，同香港有好大合作空間，相信此行可加強兩地官商民協作。