【Emily】賀國慶 民建聯免費請睇愛國電影

【明報專訊】政府已預告今年國慶將舉辦一系列活動，作為香港最大政黨嘅民建聯噚日都公布，將舉辦不同形式嘅國慶活動，包括舉辦愛國電影巡禮，免費播出《中國機長》、《驚天救援》、《萬里歸途》等電影，詳情就未公布，其中《中國機長》同講消防救援嘅《驚天救援》分別由香港導演劉偉強同彭順執導。

民建聯喺8月至10月亦會舉辦短片比賽，邀請市民喺美食、歷史文化、綠色傳承、潮流打卡點4個主題入面，拍片介紹香港嘅「另外一面」，獎品係本地酒店住宿連餐飲「Staycation」套票，而民建聯就會整理得獎者嘅作品後，向政府提出帶動本地旅遊經濟等嘅建議。

其他活動仲有免費中醫義診、中國電動車展、國慶攝影比賽、中學生壁報設計比賽等，更唔少得係剛結束嘅「三中全會」相關活動，會喺下個月舉行「三中全會對國家和香港發展的機遇」論壇。