【明報專訊】香港電車為慶祝120周年，吉祥物「叮叮貓」嚟緊暑假聯同本地動畫角色「麥兜」喺中環街市舉行慶祝活動，本月31日至9月8日仲會開設期間限定店賣精品，同市民重溫昔日電車回憶。
Emily噚日去中環街市，離遠見到大大個1：1「叮叮貓」立體模型企喺皇后大道中入口，再行入去就見到麥兜走廊「打卡」位，有唔少人影相留念。
電車公司話，麥兜動畫嘅黎根校長匿埋喺街市6個角落，市民只要搵晒佢出嚟並收集印章，即可獲一份麥兜精品。Emily見好多上班族同旅客到場後都問校長喺邊，玩得相當投入。現場另設攤位遊戲、麥兜家庭相框自拍亭同埋明信片站，畀大家創造回憶。
