【Emily】書展下架區家麟 狄志遠：似針對

【明報專訊】今屆立法會過咗兩年半，明年會有新一屆選舉，新思維狄志遠噚日被問到會唔會競逐連任，佢就話言之尚早，但會積極考慮，同時希望爭取更多黨友參選，認為作為政黨，應有更多議會代表，又話希望社會有多元聲音，相信過去同中央有溝通嘅溫和泛民可以加入議會係好事。

話適時提政改議案 盼政府履責

狄志遠當年參選政綱提過，上任100日內會提出議員議案討論重啟政改，但至今未提，佢話知道自己有責任，會搵一個最好、最有效嘅時間提出，至於幾時，佢話唔想好似參選時提出承諾結果「甩轆」，所以唔敢講明。佢重申立場話，希望政府完成23條立法嘅憲制責任，都要完成實行雙普選嘅憲制責任。

新思維上年赤字20萬元，狄志遠預計今年擴大至40萬元，但今年內有足夠現金出糧及維持服務。佢初步預計明年初將會再辦籌款宴，目標籌得「六位數」。

書展有參展商被要求下架部分書籍，包括區家麟同邵家臻嘅作品，狄志遠話詫異，認為有關書籍唔係犯法、唔係禁書，「好似針對作者多於內容」，質疑主辦單位自我審查。佢話23條立法清楚列明港人自由，結果書籍下架成為今年書展最大新聞，擔心以後都係咁，因為某些人思想保守而破壞香港。