【Emily】「十本好讀」頒獎禮 逾5萬人投票創新高 中四生寫偵探小說 獲選中學生最愛書

【明報專訊】香港教育城噚日舉行第21屆「十本好讀」頒獎禮，今屆學生投票人數創新高，突破5萬。大會新增獎項「本地原創大獎」，其中中學組由德望學校中四學生黎欣瞳所寫嘅懸疑小說《一杯奶茶，一件案情》獲得，呢本小說同時係「中學生最愛書籍」第一位。黎同學透過青協嘅「校園作家大招募計劃」，以半年時間完成處女作。

黎欣瞳對得獎感到意外，佢話一向鍾意偵探小說，但市面上較少加入本土文化嘅偵探小說，所以用奶茶作為引子，想帶出一般人「都好似奶茶一樣，平凡都可以創造偉大」。

與STEM sir同獲本地原創大獎

小學組本地原創大獎就由前教師鄧文瀚（STEM sir）所著嘅《STEM在大嶼》獲得，呢本書同時係「小學生最愛書籍」第二位。STEM sir話因為自己喺大嶼山出生長大，對呢區有感情，鼓勵讀者可以帶住佢本書走訪大澳、東涌、梅窩、昂坪等13個景點，發掘都市中嘅STEM（科學、科技、工程、數學）元素。佢舉例，喺纜車站運用到巨大渦輪綑住一條繩去旋轉，同喺屋企用衣夾同繩送啲衫出去晾嘅機械原理一模一樣，希望同學可以發揮聯想力，寓學習於生活。STEM sir 同獲選為「小學生最愛作家」；「中學生最愛作家」就由阿濃奪得。