【Emily】智能分配新𨋢「99.99999％議員不滿」

【明報專訊】立法會自從今年引入類似甲級商廈用緊嘅「智能分配系統」新𨋢後，議員對新系統風評一直麻麻，覺得實際等嘅時間長咗又唔方便，有資深議員仲話「99.99999%議員」都唔滿意。Emily聽聞立法會行管會近期傾過，由秘書處同供應商嘗試微調系統，暫時唔會推倒重來。有議員話，如果9月時再無改善，唔排除有進一步行動。

秘書處嘗試微調系統

據聞，喺議員怨聲載道下，行管會請秘書處「認真處理」𨋢嘅問題。有資深議員話，「99.99999%議員」都唔滿意系統，例如有兩個人同時分別上6樓和7樓，系統會派兩部𨋢，又或者，中間改變出𨋢樓層，就需要重新落地下。另一名議員話，今年初供應商同相關部門甚至搞一場新𨋢簡介會，但慨嘆都無從用家角度出發，𠵱家如要趕去會議廳投票，寧願行樓梯都唔搭𨋢。有新晉議員認為，轉番大家熟悉嘅舊系統係非不能、實不為也。

另外，因應立法會大樓擴建，部分𨋢要暫停使用，有時造成「塞𨋢」問題，但隨住工程近尾聲，幾部近公眾入口嘅電梯9月重新投入服務，或者可幫輕吓。至於最終新系統有冇得留低，一切要睇暑假後議員對「完善搭𨋢系統」收唔收貨。