【Emily】英大選「最美好嘅事」 導盲犬有份開會

【明報專訊】英國國會噚日係大選後第一次開會，議會新面孔仲多咗隻狗仔，開會期間好好乖咁瞓喺地下，隨即成為網上同英國政界熱話。原來呢隻金毛尋回犬係失明嘅自由民主黨新議員Steve Darling嘅導盲犬Jennie，先前曾幫佢助選，Steve當選後就陪佢由選區坐火車到倫敦開會。自由民主黨72個國會議員影大合照，Jennie都有份㗎。

Jennie唔係國會第一隻導盲犬，但唔少人留言形容佢係「最受歡迎狗議員」或「呢次大選最美好嘅事」。英國首相府本身有貓仔Larry，見證唐寧街10號嘅人去留。有人喺社交網站X幫Jennie開帳戶，並向Larry「挑機」話期待見到Larry，相信佢哋會成為好朋友。

另外，英國工黨執政後隨即擴展人手，工黨網頁分別請議員助理、研究員、個案主任、傳訊主任等職位，以倫敦地區議助為例，年薪約2.44萬至3.5萬英鎊不等，稅前月薪約近3萬港元。