【Emily】現只供少數公務員使用 葉劉倡開放長沙政府度假別墅吸客

【明報專訊】香港積極發展深度旅遊路線，其中政府建議建設「南大嶼生態康樂走廊」。新民黨主席葉劉淑儀日前到南大嶼，其間去咗「長沙政府度假別墅」參觀。葉太話別墅目前只有少數公務員能使用，建議改建成精緻嘅低密度度假屋，開放給公眾。

目前政府有7幢度假別墅，以特惠價錢供公務員及退休公務員租用，當中3幢位於大嶼山長沙，4幢坐落大埔大美督，每幢別墅可容納7至8人入住。葉太日前與黨友立法會議員陳家珮等到「長沙政府度假別墅」參觀，佢話別墅位置優良，有草地、羽毛球場等，一直深受公務員歡迎。不過佢認為，政府擬發展嘅「南大嶼生態康樂走廊」一帶缺乏住宿，與其只有少數公務員能享用別墅，建議不如改建並開放給公眾使用。

葉太話別墅設施十分簡陋同殘舊，提出改建成精緻嘅低密度度假屋，增設康樂、野火燒烤等設施，相信能吸引本地同外地旅客，享用營地之餘順道去行山。佢預告將於短期內向政府提交建議。