經濟
煤氣複製都爹利街 多角度感受香港變遷
【明報專訊】唔知大家有冇睇ViuTV套電視劇《社內相親》，又或者鍾唔鍾意MIRROR入面嘅成員Anson Lo盧瀚霆呢？話說中華煤氣（0003）最近喺金鐘太古廣場搞咗個「細看中西區微型展」，用1比24嘅比例複製都爹利街煤氣燈，而最近仲加埋香港人氣男團MIRROR成員Anson Lo嘅人型公仔，還原埋《社內相親》入面嘅一幕。
其實煤氣街燈已經喺1979年被列為香港嘅法定古蹟，同時亦都係唔少經典影視作品嘅拍攝場景，而煤氣公司亦喺展覽入面，都加入咗《夢伴》入面嘅梅艷芳、《喜劇之王》入面嘅周星馳同張柏芝，同埋《金枝玉葉》入面嘅張國榮嘅迷你人形公仔。
1比24複製都爹利街煤氣燈
煤氣公司常務董事黃維義就話，希望透過呢次展覽，可以畀大眾細緻咁欣賞都爹利街嘅煤氣燈，有多一個角度去感受香港嘅變遷。
