【Emily】九巴推69號 全女班專線 加重「女司機」標籤？ 九巴：推廣女性能勝任

【明報專訊】來往天水圍市中心及元朗德業街嘅九巴69號線本月起成為「全女班」專線，由11名女車長輪流駕駛。九巴話，期望專線可以提高女車長嘅認受性，並透露計劃喺大埔推出第二條專線。九巴又話，正向政府申請喺車廠內設立託兒設施，希望隨住加設女性友善措施，推動更多女性投入勞動市場，並將九巴現有約1萬名車長中女車長嘅佔比由8%增至10%。

九巴屯門廠車務主管麥成邦話，69路線嘅路面環境複雜多變，途經天慈路、朗天路等較高速路段，亦有狹窄內街同多車路段，有一定挑戰，希望乘客感受到女車長駕駛技術。Emily問九巴怕唔怕專線會加重「女司機」標籤，佢哋就話目標係推廣女性勝任呢項工作，而且好多乘客都欣賞女車長，就算有標籤都係關於好方面。

除咗女車長專線，九巴喺路線69嘅天水圍市中心總站旁，設立首個女車長優先使用休息室，增設有布簾同全身鏡嘅更衣空間，方便女性員工換衫。加入九巴10年嘅車長貞姐話，過往休息室無更衣位，女仔要去洗手間換制服，唔太方便，新安排就好切合需要。