【Emily】港台AI Lab啟用 可修舊片製作省時

【明報專訊】近年不同行業都嘗試引入AI（人工智能）技術，香港電台位於觀塘嘅人工智能實驗室（AI Lab）今個月都正式啟用。實驗室有多項人工智能軟件，例如語言轉換、舊片復修、提升影片及照片質素、消除雜訊、文字生成圖像及影片、轉換服飾等。

港台並引入動作捕捉系統（Motion Capture System）、高效能電腦虛幻製作引擎（Unreal Engine with High Performance Computer）、已加載AI功能嘅剪接系統和錄音系統等。港台話，各項新系統不但能縮短製作時間，又可提升畫面質素，仲令節目製作人員有更大創作空間。

人工智能實驗室會安排學生參觀，上月已安排咗12場工作坊，畀高小同初中生體驗各項AI技術，活動期間學生體驗編導嘅工作，喺虛擬錄影廠用虛擬燈光器材、攝像機及道具，拍攝虛擬偶像「小A」，又分組跟不同導師試用形象及平面設計、攝影及剪接等AI軟件。