【Emily】一日五餐出街食 張宇人話七一「交足功課」

【明報專訊】為慶祝七一，8個飲食界商會噚日推出「慶回歸優惠活動」，超過2000間食肆參與。自由黨飲食界立法會議員張宇人之前承諾七一活動當日「起碼要食四餐」，佢噚日喺facebook連環出post「認真找數」，最終食足5餐，形容自己「交足功課」。

張宇人噚日參加完升旗儀式後，上晝即刻去咗全日全線全單七折嘅太興食早餐，仲拮住粒腸仔擘大口影相，認真滋味。佢第二餐去咗美心快餐食鮮茄焗豬扒飯，話出晒名好食、食到骨都唔放過，然後去咗Circle K便利店買果汁解渴，轉個頭就去食蛋撻做下午茶。

夜晚張宇人就去咗大家樂叫咗個99元冬瓜盅二人小菜晚市套餐，再畀多10元加條蒸魚，佢話攞返屋企加餸。食足5餐嘅佢真係既有口齒，又有「食力」。