【Emily】特首迷諜劇 煲到唔瞓覺

【明報專訊】今屆政府上任近兩年，連日嚟各司局長先後接受傳媒訪問分享過去同未來工作，特首李家超接受《文匯報》同《大公報》專訪時就自爆係內地間諜劇迷，仲「煲劇煲到唔瞓」，認為香港唔夠多間諜題材影視作品，未來可以喺呢方面有多啲嘗試同推廣。

嫌香港諜片唔夠多

李家超仲分享自己嘅愛國教育經，話愛國教育可以分為理性同感性，理性教育係通過書本、活動等推廣，介紹咩係總體國家安全觀、《港區國安法》、《國安條例》等，而感性教育更加重要，可以培養自覺愛國，令愛國之情油然而生。

談愛國教育 感性重要過理性

根據報道，李家超訪問期間即場引述《我是中國人》嘅部分歌詞，話令佢聯想到抗日戰爭，傳遞作為中國人保家衛國嘅信念，「當你唱歌嘅時候，會融入歌詞，會感受歌詞中嘅歷史，帶來沉浸式嘅感受」，認為歌曲、電影、電視劇都係可以潛移默化影響受眾嘅媒介。

李家超又話，參觀歷史建築同樣可以培養愛國主義教育，例如參觀南京大屠殺遇難同胞紀念館、北京圓明園遺址時，現場景象會令人回想起昔日中國嘅屈辱歲月。