【Emily】84.2%長者有上網 升2.4百分點

【明報專訊】本港流動支付應用愈嚟愈普及，根據政府統計處噚日出版嘅《主題性住戶統計調查第80號報告書》有關互聯網及個人電腦普及程度嘅調查結果，流動支付使用程度連續6年上升，舊年有64.9%嘅15歲及以上市民喺統計前12個月內曾使用流動支付，比起2018年（35.8%）多近一倍。

調查亦顯示，銀髮族使用互聯網亦愈見普及。65歲及以上人士喺統計前12個月內曾使用互聯網嘅比率由2022年嘅81.8%，上升至舊年嘅84.2%，升咗2.4個百分點。整體使用者之中，最多人用手機上網，佔99.7%。調查亦發現，舊年男性曾用互聯網、識用個人電腦及曾用個人電腦嘅情况，都較女性普遍。

有電腦保安措施 較前年跌3百分點

另外，網絡安全事故近期有上升趨勢。針對個人電腦嘅資訊保安情况，2023年有超過300萬個擁有個人電腦嘅10歲及以上人士有為其個人電腦執行保安措施，佔比較前年同期跌3個百分點，由94%跌至91%，用戶最普遍嘅保安措施為「安裝／預先安裝保安軟件並定期更新有關軟件」。